Першае ўпамінанне пра вёску Мосар у архіўных дакументах датуецца 9 мая 1514 года. Вёска славіцца багатай гісторыяй, помнікам архітэктуры касцёлам Святой Ганны (пабудаваны ў 1792г.), непаўторнай прыгажосцю прыкасцёльнай тэрыторыі, і яшчэ Мосар – зона цвярозасці.

Напачатку летніх канікулаў вучні 5 класа і члены гуртка “Юны журналіст” пад кіраўніцтвам Алены Францаўны Грышанковіч вырашылі здзейсніць падарожжа ў вёску, якую ведаюць як беларусы, так і замежныя госці.

З самай раніцы, узяўшы гітару, мы рушылі ў бок Мосара. Надвор’е спрыяла, ісці было лёгка і весела. На прывалах гучалі песні, добры настрой суправаджаў нас на працягу ўсяго падарожжа. Перад вёскай звярнулі да гары, на якой устаноўлены самы высокі каталіцкі крыж (19,5 метраў), затым па крыжовай дарозе накіраваліся да крыніц са святой вадой і касцёла. Там сустрэліся з краязнаўцам Брэхун Ліліяй Рышардаўнай, якая распавяла нам гісторыю вёскі і касцёла.

Цікавае пазнавальнае падарожжа да мосарскай святыні запомніцца надоўга.